Սյունիքի մարզում մեքենան հայտնվել է ձորակում. 1 զոհ կա

Սյունիքի մարզում այսօր տեղի է ունեցել խոշոր ու ողբերգական ավտովթար, հայտնում է Shamshyan .com-ը: Ժամը 16:20-ի սահմաններում անհայտ մակնիշի 35 ZT 335 համարանիշի ավտոմեքենայի վարորդը Երևան-Մեղրի ավտոճանապարհի 208-րդ կմ հատվածում՝ Սիսիանի վարչական տարածքում, դուրս է եկել ճանապարհի երթևեկելի գոտուց և մոտ 50 մետր գլորվելով՝ հայտնվել ձորակում: Վթարի հետևանքով 1 հոգի տեղում մահացել է, ևս 2-ը տեղափոխվել են հիվանդանոց: Աղբյուրի հաղորդմամբ՝ ավտոմեքենան հաշվառված է Վայող Ձորի մարզի Եղեգիս գյուղի բնակիչ Վահագն Սարգսյանի անվամբ և բարձված է եղել վառելափայտով: Հարուցվել է քրեական գործ: Ոստիկանությունն ու քննչական բաժինը պարզում են վարորդի, մահացածի և վիրավորների ինքնությունը: