Կոպենհագենի կրակոցների հետևանքով զոհեր կան

Դանիայի մայրաքաղաք Կոպենհագենում անհայտ անձը կրակ է բացել Fields առևտրի կենտրոնում։ Այս մասին հայտնում է քաղաքային ոստիկանությունը սոցիալական ցանցերում։ 

Associated Press-ի փոխանցմամբ՝ ինչպես հայտնել են ոստիկանությունից՝ կրակոցների հետևանքով զոհեր և վիրավորներ կան:

Հրաձգության հետևանքով երեք մարդ է զոհվել, կան վիրավորներ, որոնցից երեքի վիճակը գնահատվում է ծայրահեղ ծանր։ Հաճախորդները խուճապահար դուրս են եկել առևտրի կենտրոնից:

Ավելի վաղ հայտնել էինք, որ քաղաքը ժամանակավորապես դադարեցրել է մետրոյի մի քանի կայարանների աշխատանքը։

Ոստիկանությունը ձերբակալել է մի տղամարդու, որը, ենթադրաբար, առնչություն ունի միջադեպին: Նրա ինքնությունը չի բացահայտվում։