«Ղարաբաղի համալսարան»՝ օկուպացված Ստեփանակերտում․ Ալիևի հերթական կարգադրությունը

Օկուպացված Արցախի մայրաքաղաք Ստեփանակերտում կստեղծվի, այսպես կոչված, «Ղարաբաղի համալսարան»: Այս մասին հաղորդում են ադրբեջանական լրատվամիջոցները՝ նշելով, որ Ադրբեջանի նախագահ Իլհամ Ալիևը  ստորագրել է համապատասխան հրամանագիրը։

«Ստեղծել Ադրբեջանի գիտության և կրթության նախարարությանը կից «Ղարաբաղի համալսարան» հանրային իրավունքի իրավաբանական անձ», - նշվում է հրամանագրում։

Հանձնարարվել է երկամսյա ժամկետում հաստատել համալսարանի կանոնադրությունը,  ձեռնարկել անհրաժեշտ միջոցներ համալսարանի գործունեությունը ֆինանսավորելու համար, լուծել համալսարանին հողատարածքով, ուսումնական մասնաշենքով և հանրակացարանով, մարզահրապարակով և այլ ենթակառուցվածքներով ապահովելու հարցերը։