Հայտնի է՝ երբ Չինաստանի տնտեսությունը կգերազանցի ամերիկյանին՝ դառնալով աշխարհում ամենամեծը

Մինչև 2035 թվականը Չինաստանի տնտեսությունը, ամենայն հավանականությամբ, կդառնա ամենամեծն աշխարհում՝ առաջ անցնելով ԱՄՆ-ից: Այս մասին գրում է ՏԱՍՍ-ը՝ վկայակոչելով Չինաստանի Ժողովրդական համալսարանին կից Չունյանգ ֆինանսական հետազոտությունների ինստիտուտի զեկույցը։

Այս սցենարը հնարավոր է, եթե ՉԺՀ-ն ՀՆԱ-ի տարեկան աճի տեմպերը պահպանի մոտ 5 տոկոսի մակարդակում հաջորդ մի քանի տարիներին կամ առնվազն 4 տոկոսից բարձր՝ մինչեւ 2035 թվականը, ասվում է զեկույցում։

Հնդկաստանի, Կանադայի, Չինաստանի, Ռուսաստանի և ԱՄՆ-ի գիտնականների համատեղ պատրաստած ուսումնասիրությունը նշում է, որ Չինաստանի տնտեսական աճի տեմպերը գերազանցում են ԱՄՆ-ի ցուցանիշները: Ընդ որում, յուանը շարունակում է ամրապնդվել միջազգային ասպարեզում, իսկ դրա միջազգայնացման աստիճանը մեծանում է։

«Զարգացող երկրները ապագայում կդառնան համաշխարհային տնտեսական աճի հիմնական շարժիչը, և դրանց արագ աճը կարող է կրկնապատկել համաշխարհային ՀՆԱ-ն հաջորդ տասնամյակում», - ասվում է «Չինաստանի Բարդ Տոկոսները. Չինաստանի բարձրորակ զարգացումը և 2035 թվականի կանխատեսումը» զեկույցում:

2023 թվականի արդյունքներով Չինաստանի ՀՆԱ-ն աճել է 5,2 տոկոսով՝ հասնելով ¥126 տրլն (17,7 տրլն դոլար) ծավալին, այն դեպքում, երբ ԱՄՆ ՀՆԱ-ն աճել է 2,5 տոկոսով՝ կազմելով 26,39 տրլն դոլար։