Ուկրաինան հայտարարել է, որ «Storm Shadow» հեռահար հրթիռներով հարվածներ է հասցնում ՌԴ-ին Լոնդոնի թույլտվությամբ

Ուկրաինացի զինվորականները օգտվել են բրիտանական իշխանությունների թույլտվությունից՝ «Storm Shadow» հեռահար հրթիռներով խոցել Ռուսաստանի տարածքում, Bloomberg-ին տված հարցազրույցում ասել է Ուկրաինայի ռազմավարական արդյունաբերության նախարարի խորհրդական Յուրի Սաքը։

Հեռուստահաղորդավարի այն հարցին, թե Կիևը կօգտագործի՞ Եվրոպայից փոխանցված զենքերը ռուսական դիրքերին հարվածելու համար, Սաքը նշել է, որ նման նախադեպ արդեն կա։ «Բրիտանական իշխանությունները նախկինում թույլ են տվել Ուկրաինային օգտագործել իրենց տրամադրած «Storm Shadow» հեռահար հրթիռները, և մենք արդեն հաջողությամբ օգտագործում ենք դրանք»,- ասել է նախարարի խորհրդականը։ Նա չի նշել, թե կոնկրետ որ ոլորտներում է օգտագործվում այս տեսակի զենքը։