«Բարի Սամարացի» ընկերության միկրոավտոբուսը բախվել է արգելապատնեշին. կան վիրավորներ

Այսօր ճանապարհի թերի կառուցման պատճառով հերթական խոշոր ավտովթարն է տեղի ունեցել Արարատի մարզում։ Ժամը 10։00-ի սահմաններում Երևան-Երասխ ավտոճանապարհի 24.5 կ հատվածում դեպի Երասխ ընթանալիս, Ford Trnsit մակնիշի ավտոմեքենայի վարորդը դուրս է եկել ճանապարհի երթևեկելի գոտուց, բախվել երկաթե արգելապատնեշներին, մոտ 40 մետր տապալել արգելապատնեշներն ու մասամբ հայտնվել ճանապարհի մեջտեղում։ Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 3 հոգի մարմնական վնասվածքներով տեղափոխվել են Արտաշատի բժշկական կենտրոն։ Ֆոտոլրագրողը հայտնում է, որ երբ Ford-ը բախվել է երկաթե արգելապատնեշներին, դրանցից մեկը շպրտվել և բախվել է դեպի Երևան ընթացող MAN մակնիշի ավտոմեքենային։ Բարեբախտաբար, MAN-ի վարորդը նույնպես ճիշտ է կողմնորոշվել, կարողացել է կառավարել ավտոմեքենան։ Ֆոտոլրագրողը նաեւ հայտնում է, որ Ford Transit-ը պատկանում է «Բարի Սամարացի» ընկերությանը։ Լուսանկարները՝ Գագիկ Շամշյանի