Փաստացի, խաղաղ բնակչությունը թիրախավորվում է, բարեբախտաբար, զոհեր չունենք խաղաղ բնակչության շրջանում. Արծրուն Հովհաննիսյան

Այսօրվա դրությամբ ադրբեջանական զինված ուժերի կողմից թիրախավորվել են հայկական բնակավայրերը, մասնավորապես` Տավուշի մարզի Չինարի, Այգեպար, Ներքին Կարմիրաղբյուր, Պառավաքար համայնքները: Հրետակոծության է ենթարկվել նաև Բերդ քաղաքը. այս մասին տեղի ունեցած ճեպազրույցի ժամանակ հայտարարեց ՀՀ ՊՆ Վազգեն Սարգսյանի անվան ռազմական համալսարանի մարշալ Հ. Բաղրամյանի անվան հրամանատարաշտաբային ֆակուլտետի պետ Արծրուն Հովհաննիսյանը:

«Փաստացի, խաղաղ բնակչությունը թիրախավորվում է, բարեբախտաբար, զոհեր չունենք խաղաղ բնակչության շրջանում»,- ասաց նա` հավելելով, որ ՀՀ զինված ուժերը բոլոր հնարավոր ձևերով լռեցրել է հակառակորդին:

Արծրուն Հովհաննիսյանի խոսքերով՝ խաղաղ բնակչության շրջանում վնասները եղել են միայն նյութական: Նա նաև տեղեկացրեց, որ խաղաղ բնակչության շրջանում հայկական որևէ բնակավայրից տարհանում տեղի չի ունեցել: