Կոչ ենք անում, որ աղբը չլցնեն ջրատար առուները. Արարատի մարզպետ

Արարատի մարզպետ Գարիկ Սարգսյանն իր ֆեյսբուքյան էջում գրել է․ 

«Օրեր առաջ Ազատաշեն և Խաչփար համայնքների սահմանով անցնող ջրանցքի աղտոտվածության խնդրի հետ կապված մի քաղաքացի էր ահազանգում և պատկան մարմինների ուշադրությունն էր հրավիրում այս տհաճ տեսարանի վրա։ Մարզպետարանը շատ արագ արձագանքել է և Երևան ՋՕԸ-ի Մասիսի տեղամասի օգնությամբ և միջոցներով հուլիսի 6-ին ջրանցքը մաքրվել է կուտակված աղբից։

Ստորև տեղադրված նկարներում երևում է, թե ինչպես և ինչ արագությամբ է ջրանցքը` մաքրմանը հաջորդող 10 օրերի ընթացքում, ամբողջությամբ լցվում շրջակա համայնքներում բնակվող մեր քաղաքացիների կողմից գեներացված կենցաղային աղբով։

[114ea15299fb937c5da840f2ebe104c7.jpg]

Մենք պարբերաբար մաքրում ենք ջրանցքը` Երևան ՋՕԸ-ի Մասիսի տեղամասի օգնությամբ և միջոցներով, բայց մեր քաղաքացիներին այս պատկերը ցույց տալով` կոչ ենք անում, որ աղբը չլցնեն ջրատար առուները, քանի որ իրենց համայնքներում շաբաթը մեկ անգամ պատշաճ կերպով աղբահանություն է կատարվում։

Եվ թող հետագայում էլ նման տեսարանի ականատես լինելուց և մեղքը պատկան մարմինների վրա բարդելուց առաջ հիշեն, թե ինչի կամ ում անբարեխիղճ պահվածքի արդյունքում է այս աղբակույտը գոյանում։

[5e583876dd4550149605d2ffd99a9d40.jpg]

Իսկ ինչ վերաբերում է քանդված կամրջին, ապա ցանկանում ենք տեղեկացնել, որ առաջիկայում կպատվիրվի նախագծանախահաշվարկային փաստաթուղթ, որի պատրաստ լինելուց և ֆինանսավորման առկայության դեպքում կմեկնարկի կամրջի շինարարությունը»։

[23f2111d2fbc0b53ff3b38e2757b9b80.jpg]