Նյու Յորքում դանակահարել են բրիտանացի գրողին, որի սպանության համար Իրանում 3,3 միլիոն դոլար են սահմանել

Նյու Յորքի արևմտյան Chautauqua ինստիտուտում դասախոսություն կարդալիս դանակահարվել է բրիտանացի գրող Սալման Ռուշդին (ծագումով հնդիկ), գրում է Associated Press-ը:

Նշվում է, որ հարձակվողը նախ բռունցքներով, ապա դանակով է հարվածել Ռուշդիին, որից հետո նրան բռնել են անվտանգության աշխատակիցները: Նյու Յորքի ոստիկանության վարչությունը պարզաբանել է, որ գրողը դանակահարվել է պարանոցի հատվածում։ Նրան ուղղաթիռով տեղափոխել են հիվանդանոց։ Առայժմ ոչինչ հայտնի չէ գրողի վիճակի մասին։

2012 թվականին իրանական կրոնական 15-Khordad հիմնադրամը գրողի սպանության համար 3,3 միլիոն դոլար պարգևավճար է սահմանել։ 1989 թվականին Իրանի գերագույն առաջնորդ այաթոլլա Խոմեյնին ֆեթվա էր հրապարակել՝ կոչ անելով սպանել պարոն Ռուշդիին: 

Այսպես, Իրանի պաշտոնյաներն ու հաստատությունները արձագանքել են Սալման Ռուշդիի «Սատանայական բանաստեղծություններ» վեպի հրապարակմանը, որը նկարագրում է դրվագներ Մուհամեդ մարգարեի կյանքից, որոնք հակասում են մահմեդական սուրբ տեքստերին: