«Զապորոժիեի շրջանում գնդակոծության տակ է հայտնվել ՄԱԿ-ի հումանիտար առաքելությունը». Ստարուխ

ՄԱԿ-ի առաքելությունը, որը հումանիտար օգնություն էր հասցնում Զապորոժիեի մարզ, գնդակոծվել է «հրադադարի ռեժիմի» ժամանակ, հայտարարել է շրջանի ռազմական վարչակազմի ղեկավար Ալեքսանդր Ստարուխը:

«Նախատեսված էր, որ գնդակոծություններ չլինեն։ Բայց, ցավոք, ռուսական կողմը, որը խոստացել էր չկրակել, այսօր առավոտից գնդակոծում էր անգամ Միավորված ազգերի կազմակերպության հումանիտար առաքելությունը, որը մարդասիրական բեռ էր բերել Օրեխով»,-նշել է Ստարուխը:

Ավելի վաղ ՌԴ նախագահ Վլադիմիր Պուտինը Ռուսաստանի պաշտպանության նախարար Սերգեյ Շոյգուին հանձնարարել էր Սուրբ Ծննդյան օրը հրադադարի ռեժիմ սահմանել Ուկրաինայի առաջնագծի ողջ երկայնքով: