Ճապոնիայի դիրքորոշումը մնում է անփոփոխ. ԱԳՆ նախարարի չհայտարարված այցը՝ Ուկրաինա

Ճապոնիայի արտաքին գործերի նախարար Յոկո Կամիկավան այցով ժամանել է Ուկրաինա։ Այս մասին լրատվամիջոցների փոխանցմամբ՝ հայտնում են Ճապոնիայի ԱԳՆ-ից։

Նշվում է, որ Կամիկավան Կիևում հանդիպում է ունեցել Ուկրաինայի արտգործնախարար Դմիտրի Կուլեբայի հետ։

«Ուկրաինա կատարած այցի ընթացքում արտգործնախարար Կամիկավան ևս մեկ անգամ հավաստիացրել է ուկրաինական կողմին, որ Ճապոնիայի դիրքորոշումը մնում է անփոփոխ․ լինել կողքին և աջակցել Ուկրաինային նույնիսկ ներկայիս բարդ միջազգային իրավիճակում»,- ասվում է հաղորդման մեջ։

Հաղորդվում է, որ Կամիկավան արտասահմանյան շրջագայություն կկատարի հունվարի 5-ից 17-ը, որի ընթացքում կայցելի Գերմանիա, Լեհաստան, Ֆինլանդիա, Նիդերլանդներ, Թուրքիա, ԱՄՆ և Կանադա: Ուկրաինա այցի մասին նախապես չի հայտարարվել։