Կիևյան կամրջի վերանորոգման աշխատանքները կատարված են 6%-ով. հնարավոր է ժամկետի երկարացում

Երևանի Կիևյան կամրջի վերանորոգման աշխատանքները կատարված են մոտ 6%-ով: Այս մասին Երևանի քաղաքապետարանի գործակարգավարական խորհրդակցության ժամանակզեկուցեց Երևանի քաղաքապետարանի շինարարության և բարեկարգման վարչության պետ Տիգրան Գեղամյանը։

«Բազալտե աստիճանավանդակի ապամոնտաժման ու նորի տեղադրման, նաև կամարների վերին հատվածների վերանորոգման աշխատանքներն ընթացքի մեջ են»,- ասաց Գեղամյանը։

Նրա խոսքով` այս տարի պլանավորված էր ավարտել կամրջի վերանորոգումը, սակայն ի հայտ են եկել նոր հանգամանքներ:

«Հայտնաբերվել են նոր աշխատանքներ, որ պետք է իրականացվեն, արդեն դիմել ենք նախագծող կազմակերպությանը, որ դա ներառեն աշխատանքի մեջ»,–ասաց նա։

Գեղամյանն ընդգծեց, որ հնարավոր է` շինարարության ժամկետի երկարացում լինի: