Այդ թույլտվությունը համապատասխանում է միջազգային իրավունքին. Բորել

ԵՄ դիվանագիտության ղեկավար Ժոզեպ Բորելը վստահ է, որ Ուկրաինայում Ռուսաստանի և եվրոպական զորքերի միջև բախում «չի սպասվում»։ Նա կարծում է, որ ԱՄՆ-ի կողմից Ուկրաինային արևմտյան զենքով Ռուսաստանի խորքերը հարվածներ հասցնելու թույլտվությունը համապատասխանում է միջազգային իրավունքին:

Հիշեցնենք՝ նա ավելի վաղ հաստատել էր՝ ԱՄՆ-ն Ուկրաինային թույլատրել է մինչև 300 կմ հեռահարությամբ հարվածներ հասցնել։

«Երկարատև քննարկումներից հետո նախագահ Ջո Բայդենը թույլատրել է հեռահար զենքի օգտագործումը՝ մինչև 300 կիլոմետր դեպի Ռուսաստանի տարածք։ Դա շատ լավ նորություն է Ուկրաինայի համար, նրանք խնդրել են դա», - նշել է Բորելը։ Նա պարզաբանել է, թե Եվրամիությունում այդ հարցը վերաբերում է ազգային իրավասությանը։