Իրաքում նավթամուղի պայթյունի հետևանքով կան զոհեր

Առնվազն երկու բանվոր է զոհվել Իրաքի Զուբայր նավթահանքում նավթամուղում բռնկված հրդեհի հետևանքով: Այս մասին հայտնել է Reuters-ը։

«Միջադեպը չի ազդել նավթի հոսքերի վրա, որոնց թողունակությունը ներկայումս կազմում է օրական 400 000 բարել»,- հայտնել են նավթավերամշակող ընկերությունների ներկայացուցիչները։

Պաշտոնյաների հաղորդմամբ, հրդեհը բռնկվել է այն պահին, երբ աշխատողների խումբը եռակցման աշխատանքներ էր կատարում նավթամուղի մոտ։ Հրշեջները պայքարել են կրակի դեմ այն հատվածում, որով հում նավթը Զուբայրից ուղղվում է դեպի մոտակա պահեստարաններ։

Պաշտոնյաները հայտնել են, որ տուժած բանվորներից հինգը ծանր այրվածքներ են ստացել և գտնվում են ծայրահեղ վիճակում, ինչը մտահոգություն է առաջացնում, որ զոհերի թիվը կարող է աճել։