Մոսկվան պատրաստ է ստորագրել անվտանգության երաշխիքներ ՆԱՏՕ-ի և ԵՄ-ի համար. Լավրով

Ռուսաստանի արտաքին գործերի նախարար Սերգեյ Լավրովը հայտարարել է, որ Մոսկվան պատրաստ է ապահովել անվտանգության երաշխիքներ՝ հաստատելով, որ որևէ մտադրություն չունի հարձակվելու ՆԱՏՕ-ի կամ Եվրամիության անդամ երկրների վրա։

«Մենք բազմիցս ընդգծել ենք, որ ՆԱՏՕ-ի կամ ԵՄ-ի անդամ որևէ երկրի նկատմամբ հարձակողական նպատակ չունենք և նման մտադրություն երբեք չի եղել։ Պատրաստ ենք այս դիրքորոշումը ներառել ապագա անվտանգության երաշխիքներում, սակայն ԵՄ առաջնորդները խուսափում են այդ հարցը քննարկել համատեղ ձևաչափով»,- նշել է Լավրովը։

Միաժամանակ, ըստ ՌԴ ԱԳՆ ղեկավարի, Ռուսաստանը համոզված է, որ Արևմուտքը պատրաստվում է նոր լայնածավալ եվրոպական պատերազմի, իսկ ՆԱՏՕ-ի ընդլայնման գործընթացը շարունակվում է առանց դադարի։