Ալեն Սիմոնյանը հայց է ներկայացրել Ռոբերտ Քոչարյանի դեմ. «Հետք»

Ազգային ժողովի նախագահ Ալեն Սիմոնյանը երեկ՝ 2026 թվականի փետրվարի 5-ին, դատարան է ներկայացրել հայցադիմում՝ ընդդեմ Հայաստանի Հանրապետության երկրորդ նախագահ Ռոբերտ Քոչարյանի։ Հայցով նա պահանջում է, որ պաշտոնաթող նախագահը հրապարակային ներողություն խնդրի իրեն վիրավորելու համար և վճարի 1 մլն դրամ փոխհատուցում։ Այս մասին հայտնում է «Հետք»-ը:

Պահանջի բովանդակության մեջ նշվում է հետևյալ ձևակերպումը․ «29.01.2026թ.-ին իմ կողմից հրավիրված մամլո ասուլիսի ժամանակ կատարել եմ վիրավորական արտահայտություններ Ալեն Սիմոնյանի վերաբերյալ, ինչի համար ներողություն եմ խնդրում պարոն Սիմոնյանից»։

2026 թվականի հունվարի 29-ին Ռոբերտ Քոչարյանի մամուլի ասուլիսի ժամանակ լրագրողներից մեկը հարց է ուղղել բանակում տիրող վիճակի վերաբերյալ՝ հիշեցնելով ԱԺ նախագահ Ալեն Սիմոնյանի գնահատականները, ըստ որոնց՝ սնունդն ու ջուրը նորմալ չէին մատակարարվում, սպաները նվաստացնում էին զինվորներին և այլ խնդիրներ կային։

Ռոբերտ Քոչարյանը զարմացել է, որ լրագրողը լուրջ է ընդունել Ալեն Սիմոնյանի հայտարարությունները՝ եզրակացություններ անելու համար՝ նշելով, որ նա «ինչ ասես դուրս է տալիս»։ Քոչարյանի խոսքով՝ իր նախագահության տարիներին բանակն այն վիճակում է եղել, որ Ադրբեջանը չի համարձակվել հարձակվել։

«Եթե պիտի բանակի մարտունակությունը գնահատի Ալեն Սիմոնյանը, էդ ու՜ր ենք հասել: Ի՞նչ է հասկանում այդ մարդը բանակից: Կասկածում եմ՝ նույնիսկ նորմալ ծառայել է: Որովհետև այդպիսի լպրծուն մարդիկ չեն կարող նորմալ ծառայել»,- լրագրողի հարցին ի պատասխան ասել է Ռոբերտ Քոչարյանը։

Ալեն Սիմոնյանը, հավանաբար, այս արտահայտություններն է համարում վիրավորական։

ԱԺ նախագահը պահանջում է, որ ներողության տեքստը հրապարակվի Ռոբերտ Քոչարյանի «Ֆեյսբուք» սոցիալական էջում՝ բոլորի համար հասանելի և տեսանելի եղանակով, առնվազն հինգ աշխատանքային օր ժամկետով, կամ անհնարինության դեպքում՝ առնվազն հինգ հազար տպաքանակ ունեցող տպագիր մամուլում։

Բացի այդ, Ալեն Սիմոնյանը պահանջում է Ռոբերտ Քոչարյանից իր օգտին բռնագանձել դատական ծախսերը՝ ընդհանուր 530 հազար դրամի չափով, որից 480 հազար դրամը փաստաբանի վարձատրության գումարն է, իսկ 50 հազար դրամը՝ պետական տուրքը։