Չինաստանում մահվան են դատապարտել Կանադայի քաղաքացու

Այսօր չինական Դալյան քաղաքի դատարանը մահապատժի է դատապարտել Կանադայի քաղաքացի Ռոբերտ Շելլենդբերգին թմրանյութերի վաճառքով զբաղվելու համար: 2014 թ.-ին Շելլենբերգը ձերբակալվել էր 222 կգ մետամֆետամինը հանցավոր խմբով Չինաստանից Ավստրալիա տանելու կասկածանքով:Հաղորդվում է, որ թմրանյութերը թաքցրել էին ռեզինե անվադողերի մեջ: Ինքը՝ կանադացին, պնդում է, թե Չինաստանում է եղել բացառապես տուրիստական նպատակներով և դարձել է հանցագործների զոհը: Նոյեմբերի 20-ին Դալյանի դատարանը կանադացուն դատապարտել էր 15 տարվա ազատազրկման, հետագայում արտահանձնման հայրենիք: Դատարանի վճիռը կանադացին բողոքարկել էր, ինչին ի պատասխան ստացել էր ավելի խիստ դատավճիռ: Կանադական լրատվամիջոցներն արդեն իսկ հայտարարում են, որ չինական դատարանի նման որոշումը կարող էր կապ ունենալ Կանադայում Huawei ընկերության ֆինանսական գծով տնօրենի ձերբակալման սկանդալային գործի հետ: