Փաստաբանին հայհոյելը քրեականացնելը զսպվածություն կբերի. Աղաջանյան

Փաստաբան Էդուարդ Աղաջանյանը կարծում է, որ փաստաբանի նկատմամբ հայհոյանքը քրեականացնելու նախագծի անհրաժեշտությունը վաղուց է առաջացել, գրում է Tert.am-ը: «Դեռևս անցած տարի նախագիծ մշակեցինք, ներկայացրինք փաստաբանների պալատ, որ Փաստաբանների պալատը ներկայացնի արդարադատության նախարարություն, քանի որ ոչ միայն աղմկահարույց, այլ հասարակ շարքային գործերով երբեմն փաստաբանները ճնշումների են ենթարկվում հակառակ կողմի հարազատների կողմից, և օրենքով դա չէր կարգավորվում»,-ասաց նա: Աղաջանյանի խոսքովՙ եթե քաղաքացիների որոշ խումբ ճանապարհ փակի և թույլ չտա՝ փաստաբանը մտնի դատարանի շենք և այդ ձևով խոչընդոտի փաստաբանի գործունեությունը, դա ներկայիս գործող քրեական օրենքի իմաստով հանցագործություն չի համարվում: Դիտարկմանը, թե ամեն դեպքում պատիժ սահմանված է, ինչո՞ւ առանձնացնել և քրեականացնել այն դեպքում, երբ հայհոյանքը ապաքրեականացվել է, փաստաբանն ասաց, որ սա մասնավոր մեղադրանքի տիրույթում է, և փաստաբանին հարվածում են ոչ թե որպես քաղաքացի, այլ որպես փաստաբան` իր մասնագիտական գործունեության հետ կապված: «Պետք է առանձին դիտվի, այսինքն` եթե մարդը փաստաբան չլիներ, նրան ոչ մեկը չէր հայհոյի, վիրավորի»,-ասաց նա: