Ղազախստանի թղթադրամների վրա ռուսերեն գրություններ այլևս չեն լինի

Ղազախստանի իշխանությունները փոխել են թղթադրամների և մետաղադրամիՙ տենգեի դիզայնը: Այժմ դրանց վրա ռուսերեն գրություններ չեն լինի: Երկրի նախագահ Նուրսուլթան Նազարբաևի համապատասխան հրամանը հրապարակված է տեղի լրատվամիջոցներում: «Ազգային թղթադրամների և մետաղադրամների վրա արվող գրությունները պետք է լինեն միայն պետական լեզվով: Ղազախստանի Ազգային բանկի կողմից թողարկվող ներդրումային և կոլեկցիոն մետաղադրամների ձևավորման համար կարող են օգտագործվել օտար լեզուներով գրություններ»,- ասված է հրամանագրում: Նշենք, որ նախկինում ղազախական տենգեի վրա ղազախերենին հավասար թույլատրվել է օգտագործել նաև ռուսերեն գրություններ: Ռուսերենը Ղազախստանում ունի պաշտոնական, բայց ոչ պետական լեզվի կարգավիճակ: Ըստ երկրի Սահմանադրության` այն կիրառվում է պետական բոլոր հաստատություններում: 2016 թ.-ին Նուրսուլթան Նազարբաևը պահանջել է ցուցադրաբար աշխատանքից ազատել այն չինովնիկներին, ովքեր հրաժարվել են մարդկանց հետ ռուսերեն խոսել: Սակայն, արդեն նախորդ տարվա փետրվարին նա հայտարարեց,որ իշխանական բոլոր մարմիններըՙ խորհրդարանն ու կառավարությունը, պետք է աշխատանքի ընթացքում կիրառեն ղազախերենը: