Ես կհորդորեմ Արսեն Թորոսյանին իր ասելիքը ասել մարդու երեսին. Շուշան Դանիելյան

ԵՊԲՀ աշխատակազմի ղեկավար Շուշան Դանիելյանը SHANTNEWS.am-ի հետ զրույցում մեկնաբանել է առողջապահության նախարար Արսեն Թորոսյանի այն հայտարարությունը, թե այսօրվա տապալված ասուլիսի շոուն ամբողջապես ԵՊԲՀ ռեկտոր Արմեն Մուրադյանի ձեռքի գործն է:

«Ես կհորդորեմ Արսեն Թորոսյանին իր ասելիքը ասել մարդու երեսին: Դա ամբողջովին ապատեղեկատվություն է: Թամամյան Գևորգի անցած ուղին թույլ է տալիս իրեն ասել սեփական կարծիքը, և նախարարը այդ պահին հնարավորություն ուներ պատասխանել բոլոր հարցերին: Թամամյան Գևորգը բարձրաձայնեց շատ կայացած բժիշկների կարծիքը»,- մեզ հետ զրույցում ասաց Շուշան Դանիելյանը:

Մեր այն հարցին, թե ինչու է Արսեն Թորոսյանը տվել հենց Արմեն Մուրադյանի անունը, Շուշան Դանիելյանն ասաց, որ դա լավ կլինի իմանալ հենց նախարարից:

Հիշեցնենք, որ առողջապահության նախարար Արսեն Թորոսյանի այսօրվա մամուլի ասուլիսի ժամանակ ներս էր մտել մանկական ուռուցքաբան Գևորգ Թամամյանը` փորձելով հարցեր ուղղել նախարարին, սակայն Թորոսյանն ասել է, որ չի ուզում խոսել նրա հետ և կիսատ է թողել ասուլիսը:

Նախարարի փոխարեն խոսել է Գևորգ Թամամյանը` նշելով, որ նախարարը խուսափել է զինծառայությունից, քանի որ նշվել է, թե ունի առողջական խնդիրներ, սակայն Ստեփանակերտում եղել է գրագիր, այնինչ դա հիմք չէ զինծառայությունից խուսափելու համար:

Թամամյանը նաև հայտարարել էր, թե բոլոր հիվանդանոցների կառավարող խորհուրդներում նշանակված են նախարարի մտերիմները: