Եթե նրանք գործարքի չգնան ռմբակոծություններ կլինեն. Թրամփը սպառնացել է Իրանին

Թրամփն Իրանին սպառնում է «աննախադեպ ռմբակոծություններով» ԱՄՆ նախագահ Դոնալդ Թրամփը NBC News-ին տված հարցազրույցում սպառնացել է «աննախադեպ ռմբակոծումներով», եթե ԱՄՆ-ն ու Իրանը համաձայնության չգան։

«Եթե նրանք գործարքի չգնան ռմբակոծություններ կլինեն: Դա կլինի այնպիսի ռմբակոծություն, ինչպիսին նրանք նախկինում չեն տեսել», - հեռուստաալիքը մեջբերում է Թրամփի խոսքերը նրա հետ հարցազրույցում։

Միաժամանակ ԱՄՆ նախագահը հավելել է, որ Վաշինգտոնն ու Թեհրանը ներկայումս շփումներ ունեն։

Ավելի վաղ Իրանի նախագահ Մասուդ Փեզեշքիանը հայտարարել էր, որ Թեհրանը նախագահ Թրամփին ուղղված պատասխան նամակում հրաժարվել է միջուկային ծրագրի շուրջ Վաշինգտոնի ուղիղ բանակցություններից. բանակցությունների պատուհանը բաց է միայն երրորդ երկրների միջնորդությամբ։