Հնդկաստանը պլանավորում է կրճատել ռուսական նավթի ներմուծումը Թրամփի հայտարարությունից հետո

Հնդկաստանը պատրաստվում է կրճատել ռուսական նավթի ներմուծումը՝ ԱՄՆ նախագահ Դոնալդ Թրամփի ճնշման ֆոնին, հաղորդում է Reuters-ը՝ հղում անելով աղբյուրներին։

Նախորդ օրը Դոնալդ Թրամփը հայտարարել էր, որ Հնդկաստանի վարչապետ Նարենդրա Մոդին պատրաստակամություն է հայտնել դադարեցնել ռուսական նավթի գնումները։ Թրամփը հավելել է, որ այժմ պետք է ապահովի, որ Չինաստանը նույնպես նույնը անի։

Ավելի ուշ Հնդկաստանի արտաքին գործերի նախարարության խոսնակ Ռանդհիր Ջայսվալը հայտարարել է, որ Նյու Դելին կենտրոնանում է էներգակիրների ներմուծման հարցում իր սպառողների շահերի վրա։ Նա նշել է, որ Հնդկաստանը նավթի և գազի ամենամեծ ներմուծողն է, և անկայուն էներգետիկ իրավիճակի պայմաններում հնդիկ սպառողների շահերի պաշտպանությունը գերակա խնդիր է։