Մանվել Գրիգորյանին կալանավորելու որոշումը կայացվել է ճնշումների տակ. փաստաբան

ՀՀ ԱԺ նախկին պատգամավոր Մանվել Գրիգորյանին կալանավորելու դատարանի որոշման հրապարակումից հետո նրա պաշտպանները ետնամուտքով դուրս եկան՝ այդպես էլ չպատասխանելով լրագրողների հարցին: Նրա պաշտպաններից Արսեն Մկրտչյանը ֆեյսբույքյան իր էջում դիմելով լրագրողներին գրել է. «Հարգելի լրագրողներ, խնդրում եմ՝ չզանգել՝ օրենքի, իրավաբանության, տրամաբանության հետ կապ չունեցող և ճնշումների տակ կայացրած հակահայկական դատական ակտերն առայժմ չեմ մեկնաբանում»: Նշենք, որ Մանվել Գրիգորյանը դեկտեմբերի 21-ին Երևանի ընդհանուր իրավասության դատարանի որոշմամբ (դատավոր Դավիթ Բալայան) 25 միլիոն դրամ գրավի դիմաց ազատ էր արձակվել։ Գլխավոր դատախազությունը բողոքարկել էր այդ որոշումը։ Գրիգորյանի՝ ազատ արձակվելուց հետո մի խումբ անձանց կողմից բողոքի ակցիաներ էին անցկացվում Երևանում ու Էջմիածնում։ Այսօր այդ ակցիայի մասնակիցները հայտարարում էին, որ արդարությունը վերականգնվել է։