ԱԱԾ զինծառայողները սահմանին պարտավոր են իրականացնել հարցումային աշխատանք

«ԱԱԾ սահմանապահ զորքերի զինծառայողները պետական սահմանի անցման կետերում իրավունք ունեն և պարտավոր են իրականացնել հարցումային աշխատանք»,- այս մասին ասվում է ՀՀ ԱԱԾ մամուլի կենտրոնի պետ Ս. Գալստյանի AuroraNews-ի հարցմանը տված պատասխանում։ Նշենք, որ օրեր առաջ բազմաթիվ զանգեր ենք ստացել ռադիոլսողներից, որոնք հետաքրքրվում էին, թե ինչո՞ւ են հայ սահմանապահները Վրաստանի հետ սահմանային կետը հատելիս, բոլոր ուղևորներից հետաքրքրվում, թե ի՞նչ մեքենայով են երթեւեկում, մեքենայի համարանիշը, մակնիշը, գույնը եւ այլն: Ռադիոլսողները նշում էին, որ ի պատասխան հակադարձող հարցին, թե մաքսակետի աշխատակիցների ինչի՞ն է պետք նման տեղեկությունը՝ չեն ստացել պատասխան։ Այս հարցով AuroraNews դիմել էր Ազգային անվտանգության ծառայությանը։ ԱԱԾ պատասխանը ներկայացնում ենք ստորև․ «Ի պատասխան Ձեր հարցման հայտնում ենք, որ ՀՀ ԱԱԾ սահմանապահ զորքերի զինծառայողները պետական սահմանի անցման կետերում իրավունք ունեն և պարտավոր են իրականացնել հարցումային աշխատանք: Հարցումային աշխատանքի ընթացքում նաև ճշտվում է, թե քաղաքացին ՀՀ մուտք գործելիս ինչ տրանսպորտային միջոցով է ժամանել անցման կետ և այդ տեղեկատվությունը մուտքագրվում է համակարգ՝ հոսքերի կառավարման, ուղղորդման և հետագա վերլուծության նպատակներով»: