Եթե իշխանությունը հանձնարարի դպրոցների տնօրեններին կրծքով փակել քվեախցիկը, մեծ մասն անելու է. Զոհրաբյան

Անդրադառնալով նախորդ զեկուցող Լևոն Բարսեղյանի բարձրացրած հարցին` ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը ԱԺ-ում հայտարարեց.

«Ես որևէ երաշխիք չունեմ, գրեթե համոզված եմ, որ եթե այսօր իշխանությունը հանձնարարի դպրոցների տնօրեններին անել նույն բանը` լինի պատերին նկարներ ճպպացնել, լինի կրծքով փակել քվեախցիկը, գերակշիռ մեծամասնությունը անելու է: Որևէ մեկը չասի` չի անելու, որովհետև իր մոտ հեղափոխություն է տեղի ունեցել»:

Նա խոսեց նաև բուհերում կոռուպցիայի դեմ պայքարի գործընթացի մասին, հայտարարեց.

«Բուհերում կոռուպցիան առաջնագծում կատաղիորեն դիմադրում է, լավ է, որ ակտիվացել է դիսկուրսը, քննարկումները կրթական բարեփոխումների շուրջ, իհարկե, հնչում են ծայրահեղ կարծիքներ` քանդել-փշրել ամեն ինչ: Վերջին շրջանում որոշ մոդեռնիստներ փորձում են հակադրել ազգայինը ժամանակակցին, իսկ ո՞վ է ասել, որ ազգայինը չի կարող լինել ժամանակակից, կարող է լինել շատ էլ ժամանակակից: Ես անարխիստ չեմ, բայց ուզում եմ ցիտել անարխիստ Բակունինի մի միտքը, որի յուրաքանչյուր բառի տակ ստորագրում եմ` «ժամանակակիցը հակաէսթետիկի և այլասերվածության էպատաժային քարոզը չէ», ու ավանդականը անախրոնիզմ չէ: Ես, այո´, տոլերանտ եմ մինչ այն պահը, երբ չեն ներխուժում իմ անձնական տարածք` առանց իմ թույլտվությունը ունենալու»,- իր ելույթն ամփոփեց Զոհրաբյանը: