Իրանում ձերբակալվել է ուկրաինական ինքնաթիռի խոցման պահը նկարահանած տղամարդը

Իրանում ձերբակալվել է հունվարի 8-ին ուկրաինական Boeing 737-800 ինքնաթիռի վրա իրանական հրթիռի արձակման պահը տեսանկարահանած տղամարդը: Այս մասին հայտնում է ВВС-ն: Նշվում է, որ տղամարդուն մեղադրանք է առաջադրվելու ազգային անվտանգության սպառնալիքի համար: 

Հիշեցնենք` հունվարի 7-ի, լույս 8-ի գիշերը ուկրաինական ավիաընկերությանը պատկանող Boeing 737-800–ը թռիչքից րոպեներ անց կործանվել էր Թեհրանի օդանավակայանի մոտակայքում։ Մահացել էին օդանավում գտնվող բոլոր ուղևորներն ու անձնակազմի անդամները, ընդհանուր` 176 մարդ։ Նույն գիշեր Իրանը հրթիռակոծել էր Իրաքի տարածքում տեղակայված ամերիկյան ռազմաբազան և ավիաբազան։ Իրանը պաշտոնապես հայտարարել է, որ ինքնաթիռը խոցվել է զինվորականների սխալի հետևանքով: