ՊԵԿ նախագահի աշխատասենյակում փակցված է Փաշինյանի լուսանկարը

«Այո, ՀՀ վարչապետի լուսանկարը փակցված է իմ աշխատասենյակում»․ այս մասին լրագրողների հետ զրույցում հայտնել է ՀՀ պետական եկամուտների կոմիտեի նախագահ Ռուստամ Բադասյանը։

Վերջինս նշեց, այդպիսին է սահմանված նոր կարգը, այդպիսի ընթացակարգ է։

«Որևէ օրենսդրական կարգավորում չկա, ուղղակի այդպես է հիմա ընդունված, այդ կարգը պահպանվում է։ Կառավարությունն է որոշել»։

Վերջինս անդրադարձավ նաև տեղեկություններին, իբրև կադրային ջարդ է սկսել կոմիտեում։ Բադասյանը նշեց, որ փոփոխությունները բնական երևույթ են կրում։ Վարչության պետերի փոխատեղումներ կան, նոր նշանակումներ կան և հիմնական գերակշիռ հատվածը համակարգի ներսից են։

«Կադրային ջարդ չի իրականացվում, իրականացվում է սովորական կադրային քաղաքականություն, որը բնական է ցանկացած պետական մարմնի համար։ Կադրային քաղաքակնության հիմքում ընկած է մեկ սկզբունք՝ այն, որ նախապատվությունը տալիս ենք այնպիսի աշխատակիցների, որոնք ունեն համապատասխան պոտենցիալ՝ հարկային, մաքսային համակարգում ցուցաբերել են իրենց որպես պրոֆեսիոնալ կադրեր»։