Գյումրիում երիտասարդը փորձել է պայթեցնել ոստիկանության Մուշի բաժինը

Գյումրիում երիտասարդ տղամարդը մտել է ոստիկանության Մուշի բաժին և փորձել պայթեցնել շենքը։ Տեղեկությունը հայտնում է Sputnik Արմենիայի թղթակիցը։

Միջադեպը եղել է մայիսի 22-ին, ժամը 17.30-ի սահմաններում։

Տղամարդը մտնելով ոստիկանության բաժին նշել է, որ անձնական խնդիրներ ունի, գրպանից հանել է «Ֆ-1» տիպի նռնակը և սպառնացել պայթեցնել, եթե խնդիրը լուծում չստանա:

Գյումրեցի իրավապաշտպան Կարապետ Պողոսյանը Sputnik Արմենիային տեղեկացրեց, որ 27-ամյա տղամարդը ոստիկանական բաժանմունք է գնացել նռնակը ձեռքին և փորձել է ոչ թե մասնաշենքը պայթեցնել, այլ իրեն։ Ոստիկանները միջամտել են, փորձել են վնասազերծել նրան։

Տղամարդը ձերբակալվել է: Նախաձեռնվել է քրեական վարույթ, հանգամանքները պարզվում են։