«Հայ բնակչություն ունեցող քաղաքներն առավոտը դիմավորեցին ռմբապաստարաններում»․ «Իսրայելահայեր» թերթի խմբագիր

Իսրայելը վաղ առավոտից հրթիռակոծվում է, մարդիկ արթնացել են պայթյունների ձայներից: Այս մասին ֆեյսբուքյան էջում հայտնել է «Իսրայելահայեր» թերթի գլխավոր խմբագիր, Պետախ Տիկվա քաղաքի իսրայելահայերի «Նաիրի» միության նախագահ Արտյոմ Չերնամորյանը։

«Տասնյակ քաղաքներ, որոնք հայկական բնակչություն ունեն առավոտը դիմավորեցին ռմբապաստարաններում: Կենտրոնական քաղաքներից հատկապես հարձակումների թիրախում են հայտնվել Ռիշոն Լեցիոնը, Բատ Յամը, Խոլոնը, Թել Ավիվը, Պետախ Տիկվան, Ռամատ Գանը- Կֆար Սաբան, Հոդ Հաշոռոնը»,– գրել է նա:

Չերնամորյանի խոսքով` հատկապես ծանր հրթիռակոծության են ենթարկվել Իսրայելի հարավային շրջաններն ու քաղաքները՝ Աշդոտ, Աշկելոն, Կիրյատ Գատ, Սդերոտ, Բեեր Շևվա, Սդերոտ քաղաքները: Իսկ Աշկելոնում հրթիռը ընկել է շենքի վրա, կա մեկ զոհ, վիրավորների և տուժածների մասին դեռ չի հաղորդվում:

Նա նաև կադրեր է հրապարակել Սդերոտ քաղաքից։ Մարդիկ իրենց բնակարաններից նկարահանել են քաղաք ներթափանցած գրոհայիններին, որոնք զենքը ձեռքներին շրջում են քաղաքի փողոցներով։

Նշենք, որ Գազայի հատվածից չդադարող հրթիռակոծության և գրոհայինների ներթափանցման ֆոնին Իսրայելի պաշտպանության նախարար Յոավ Գալանտը պահեստազորայինների զանգվածային հավաք է հայտարարել: Իսրայելի պաշտպանության բանակն էլ պատերազմի պատրաստականության ռեժիմ է հայտարարել։ Վարչապետ Բենիամին Նեթանյահուն մեկնել է պաշտպանության նախարարության շտաբ ՝ ուժային հրամանատարության հետ խորհրդակցության:

Հարավային և կենտրոնական շրջանների քաղաքացիական բնակչությանը հրահանգվել է գտնվել ապաստարանների մոտ, իսկ Գազայի հատվածին հարող տարածքի բնակիչներին ՝ ապաստարանների ներսում: