Իրանը համաձայնել է ուրանի հարստացման մակարդակի թուլացմանը

Իրանի խորհրդարանի փոխխոսնակ Ալի Նիկզադը հայտնել է, որ Թեհրանը բարի կամքի դրսևորման շրջանակում տվել է իր համաձայնությունը մոտ 450 կիլոգրամ հարստացված ուրանի թուլացման գործընթացի վերաբերյալ։

Իրանցի պաշտոնյայի խոսքով՝ այս քայլն իրականացվել է միջուկային ծրագրի շուրջ առկա լարվածությունը նվազեցնելու նպատակով, սակայն հետագայում ամերիկյան կողմը հրաժարվել է ձեռք բերված պայմանավորվածություններից։ Նախագծով նախատեսվում էր Իրանի տարածքում ստեղծել հատուկ կոնսորցիում, որը պետք է իրականացներ ուրանի մշակումը։ Ծրագրին պետք է մասնակցեին նաև ԱՄՆ-ի և Սաուդյան Արաբիայի ներկայացուցիչները, ինչը կարող էր դառնալ միջազգային համագործակցության նոր ձևաչափ՝ միջուկային անվտանգության ապահովման համար։

Բացի այդ, բանակցությունների ընթացքում քննարկվել է Հորմուզի նեղուցի կարգավիճակը։ Նիկզադը նշել է, որ Վաշինգտոնն առաջարկել է նեղուցի համար սահմանել հատուկ իրավական ռեժիմ՝ հաշվի առնելով ԱՄՆ դերակատարությունը։ Այդուհանդերձ, Իրանի օրենսդիր մարմնի ներկայացուցիչը վերահաստատել է երկրի կոշտ դիրքորոշումը՝ շեշտելով, որ Պարսից ծոցում և նեղուցի տարածքում արտաքին ուժերի ներկայությունն իրենց պետության համար անընդունելի է։