ՏԵՍԱՆՅՈՒԹ. ԱՄՆ փոխնախագահը ժամանել է Իսլամաբադ

ԱՄՆ փոխնախագահ Ջեյ Դի Վենսը ժամանել է Պակիստանի մայրաքաղաք Իսլամաբադ՝ նախատեսված բանակցությունների համար Իրանի պատվիրակության հետ։ Reuters-ի փոխանցմամբ՝ հանդիպումը մեկնարկելու է ապրիլի 11-ին և կարող է դառնալ երկու երկրների միջև ամենանշանակալի ուղիղ շփումը 1979 թվականից ի վեր։

Ամերիկյան պատվիրակությունը մեկնել է Վաշինգտոնից ապրիլի 10-ի երեկոյան Air Force Two ինքնաթիռով։ Վենսի հետ Իսլամաբադ են ժամանել նաև ԱՄՆ նախագահի Մերձավոր Արևելքի հատուկ ներկայացուցիչ Սթիվեն Ուիտքոֆը և Ջարեդ Քուշները։

Իրանական կողմը ներկայացնում է խորհրդարանի խոսնակ Մոհամմադ-Բաղեր Ղալիբաֆը։ Նրա հետ միասին ժամանել են արտգործնախարար Աբբաս Արաղչին և Ազգային անվտանգության բարձրագույն խորհրդի քարտուղարի տեղակալ Ալի Բաղերի Քանին։ Tasnim գործակալության տվյալներով՝ Իրանի պատվիրակությունը բաղկացած է 71 անդամից։

Պակիստանը հանդես է գալիս որպես միջնորդ։ Նրա պատվիրակության կազմում ընդգրկված են արտգործնախարար Մուհամմադ Իշակ Դարը, բանակի հրամանատար Ասիմ Մունիրը, Ազգային ժողովի խոսնակ Այազ Սադիկը և ներքին գործերի նախարար Մոհսին Նաքվին։

Բանակցություններին նախորդել է շուրջ 40 օր տևած ռազմական հակամարտություն, որի ընթացքում, ըստ հաղորդումների, զոհվել է ավելի քան 3000 մարդ։ Ապրիլի 8-ին Պակիստանի, Թուրքիայի, Չինաստանի, Սաուդյան Արաբիայի և Եգիպտոսի միջնորդությամբ ձեռք է բերվել երկշաբաթյա հրադադար, որի պայմաններից մեկը Իսլամաբադում բանակցությունների անցկացումն էր։