Դոնալդ Թրամփը նախազգուշացրել է Իրանին

ԱՄՆ նախագահ Դոնալդ Թրամփը Truth Social սոցիալական ցանցի իր էջում անդրադարձել է Իրանի հետ առկա լարվածությանը՝ ներկայացնելով իրանական ռազմածովային ներուժի վերաբերյալ սեփական գնահատականները։ Սպիտակ տան ղեկավարի պնդմամբ՝ Իրանի ռազմածովային նավատորմը գրեթե ամբողջությամբ ոչնչացված է. խոսքը 158 նավերի մասին է, որոնք այժմ գտնվում են ծովի հատակին։

Ըստ Թրամփի՝ ամերիկյան կողմը թիրախավորել է գրեթե բոլոր կարևոր միավորները՝ բացառությամբ փոքր թվով արագընթաց հարվածային մոտորանավակների։ Վերջիններս, ըստ նախագահի, մինչ այժմ չեն դիտարկվել որպես լուրջ ռազմավարական սպառնալիք, սակայն այժմ դրանց գործողությունները գտնվում են խիստ վերահսկողության ներքո։

ԱՄՆ նախագահը խիստ նախազգուշացում է հղել Թեհրանին՝ նշելով, որ սահմանված շրջափակումը խախտելու ցանկացած փորձ կկանխվի անհապաղ։ Նա շեշտել է, որ մոտորանավակների մոտեցումը արգելված գոտիներին կհանգեցնի դրանց ոչնչացմանը։ Որպես օրինակ՝ Թրամփը մատնանշել է ծովային ճանապարհով թմրաշրջանառության դեմ պայքարի փորձը, որի շնորհիվ, ըստ նրա տվյալների, կանխվել է ԱՄՆ ներթափանցող թմրանյութերի ավելի քան 98%-ը։