Գեներալ Մանվելն Ակնալճի տարածքից չի տեղաշարժվում․ Պաշտպան

Դատախազությունն այդքան ողջամտություն չուներ, որ չբողոքարկեր Մանվել Գրիգորյանին գրավի դիմաց ազատ արձակելու հիմնավորված որոշումը: Առաջնորդվում են «փակենք, սպանենք, հետո պետությունը թող վճարի» գործելաոճով: Այս մասին Tert.am-ի հետ զրույցում ասաց Մանվել Գրիգորյանի պաշտպան Արսեն Մկրտչյանը` անդրադառնալով Դատախազության կողմից Մանվել Գրիգորյանի խափանման միջոցի փոփոխության դեմ Վերաքննիչ բողոք ներկայացնելու մասին որոշմանը: Անդրադառնալով հարցին՝ արդյոք Ակնալիճի առանձնատան տարածքից դուրս գալ կարողանո՞ւմ է Մանվել Գրիգորյանը, Արսեն Մկրտչյանն ասաց, որ առայժմ նրա առողջությունը թույլ չի տալիս ելումուտ անել, բայց այդ առումով սահմանափակումներ, կարծում է, որ չկան, խնդիրը կապված է միայն առողջության հետ: Արսեն Մկրտչյանի կարծիքով՝ «Մանվել Գրիգորյանին դիմավորողների, խափանման միջոցի փոփոխության համար ուրախ, ադեկվատ, նորմալ ՀՀ քաղաքացիների քանակը ճնշող մեծամասնություն է»: Նա հավելել է, որ նախկին պատգամավորը հանդիպումներ ունենում է տարբեր մարդկանց հետ: