Ադրբեջանցի լրագրողներ Հայաստանում՝ ոչ առաջին անգամ․ Մանրամասներ՝ Turan-ի խմբագրի այցից

Ինչպես գիտենք՝ այսօր կայացած ճեպազրույցի ժամանակ ՀՀ ԱԳՆ մամուլի խոսնակ Աննա Նաղդալյանը հայտնել էր, որ ադրբեջանական «Turan» լրատվական գործակալության խմբագիր Շահին Հաջիևն իր լրագրողների խմբով ժամանել է Հայաստան` մասնագիտական գործունեություն ծավալելու: Հաջիևն արդեն իսկ հասցրել է հարցազրույցներ ունենալ տարբեր գործիչների հետ, այդ թվում ՀՀ նախագահի հասարակական հիմունքներով խորհրդական, քաղաքագետ Թևան Պողոսյանի հետ։ AuroraNews-ի հետ զրույցում Թևան Պողոսյանը պատմեց, որ Հաջիևի հարցազրույցը վերաբերում էր հիմնականում վերջին շրջանում Հայաստանում ընթացող փոփոխություններին, այն ամենին ինչ կատարվել է և տեղի է ունենում։ Հարցեր են եղել նաև արտաքին քաղաքական ուղղվածության վերաբերյալ, Արցախյան հիմնախնդրի, ինչպես նաև հայ-թուրքական հարաբերությունների մասին։ "Եթե ցանկանում են իրենց աչքերով տեսնել և պարզել, ապա ուրախ եմ, որ եկել են Հայաստան, ավելի ուրախ կլինեի, որ մեկնեին նաև Արցախի Հանրապետություն։ Գնային էնտեղ և իրենց աչքերով տեսնեին, խոսեին մարդկանց հետ և հասկանային, որ շատ ստերեոտիպներ, որոնք երևի Ադրբեջանում մեր մասին պատմում են, չեն համապատասխանում իրականությանը", - ասել է Պողոսյանը։ AuroraNews-ը զրուցել է նաև ԱԳՆ մամուլի խոսնակ Աննա Նաղդալյանի հետ։ Վերջինս նշել է, որ ադրբեջանցի լրագրողների խումբն արդեն հեռացել է Հայաստանից։ Նաղդալյանի խոսքով՝ սա Ադրբեջանից և այլ երկրներից լրագրողական առաջին այցը չէ Հայաստան։ "Դա եղել է տարիներ շարունակ։ Սրա մեջ հատուկ մեսիջ փնտրել պետք չէ։ Մենք միշտ բաց ենք եղել լրագրողների առաջ",- ասել է Նաղդալյանը։ Նա հավաստիացրել է, որ ադրբեջանցի լրագրողները հանդիպումներ են ունեցել էքսպերտային մակարդակով և հանդիպել են միայն իրենց գործընկերների հետ։