Ազգային ժողովը «ներեց» զորակոչից խուսափած 27 տարին լրացած անձանց

Ազգային ժողովը երկրորդ և վերջնական ընթերցմամբ միաձայն ընդունեց «Սահմանված կարգի խախտմամբ զինվորական ծառայություն չանցած քաղաքացիների մասին» օրենքում փոփոխությունների նախագիծը, որը զինվորական ծառայությունից խուսափած 27 տարեկան երիտասարդներին ազատում է քրեական հետապնդումից համապատասխան տուգանք վճարելու դեպքում։ Օրենքում փոփոխությունները հնարավորություն կտան քաղաքացիներին, որոնք 2018թ.–ին և մինչև 2019թ.–ի մարտի 1–ը դարձել են 27 տարեկան, վերադառնալ Հայաստան, համապատասխան գումար վճարել և ազատվել քրեական պատասխանատվությունից։ Գործող օրենքը վերաբերում էր նրանց, ովքեր մինչև 2018թ–ը դարձել են 27 տարեկան։ «Կան բազմաթիվ քաղաքացիներ, որոնք սպասում են այս օրինագծի ընդունմանը, ուստի մենք նախաձեռնել ենք դրա քննարկումը։ Այն կվերաբերի մոտ 2 հազար հոգու», – նախօրեին նախագիծը ներկայացնելիս հայտարարել էր օրինագծի հեղինակներից մեկը` «Լուսավոր Հայաստան» կուսակցության պատգամավոր Գևորգ Գորգիսյանը։ Նշենք, որ փետրվարի վերջին պաշտպանության և անվտանգության հարցերի մշտական հանձնաժողովի քննարկումների ժամանակ հանձնաժողովի նախագահ Անդրանիկ Քոչարյանը հայտնեց, որ ներկա պահին 27-35 տարեկան 3225 զինապարտ է հետախուզվում։