Այն խնդիրը, որ մենք հիմա ունենք, նոր չի, խնդիրները 10 տարվա են. Ռևազյան

Այն խնդիրը, որ մենք հիմա ունենք, նոր չի, խնդիրները 10 տարվա են: Այս մասին այսօր՝ դեկտեմբերի 16-ին, լրագրողների հետ հանդիպման ժամանակ նշեց Քաղաքացիական ավիացիայի կոմիտեի նախագահ Տաթեւիկ Ռեւազյանը՝ անդրադառնալով փաստին, որ Եվրահանձնաժողովը ավելի խիստ հսկողության տակ է վերցրել Հայաստանի Քաղաքացիական ավիացիայի կոմիտեն։

«Հիմա մենք այդ խնդիրները մաքրում ենք: Մենք գնացել, մասնակցել ենք համապատասխան կոմիտեի նիստին, լավ պրեզենտացիա ենք արել, որի արդյունքում որեւէ հայկական ավիաընկերություն չի հայտնվել այսպես ասած, «սեւ ցուցակում»,-ասաց նա:

Ռեւազյանը նաեւ նշեց, որ որեւէ պատժատեսակ Հայաստանի նկատմամբ չի կիրառվել. «Հայաստանում գրանցված ավիաընկերությունները դիմել են, որ չվերթ իրականացնեն Եվրոպա, նրանց մոտ խնդիրներ են նկատել, որի հետեւանքով հսկողությունն ավելացել է մեր Քաղավիացիայի նկատմամբ: Եթե ավիաընկերությունները շուտ դիմեին, խնդիրն ավելի շուտ կառաջանար:

Ավելի վաղ NEWS.am-ը հայտնել էր, որ Եվրահանձնաժողովը ավելի խիստ հսկողության տակ է վերցրել Հայաստանի Քաղաքացիական ավիացիայի կոմիտեն։

Այդ խնդրի վերաբերյալ Տաթեւիկ Ռեֆազյանը նշել էր, որ խնդիրն առաջացել է այն բանից հետո, երբ Taron Avia, Atlantis European Airways եւ «Ավիակոմպանիա Արմենիա»-ն ցանկացել են չվերթներ իրականացնել դեպի Եվրոպա. փորձել են թույլտվություն ստանալ։ «Ավիակոմպանիա Արմենիա»-ն անցել է ստուգումը, Atlantis European Airways -ն անցել է որոշակի խնդիրներով, իսկ Taron Avia-ն չի անցել, քանի որ լուրջ խնդիրներ են հայտնաբերվել, որոնք ազդել են թռիչքային անվտանգության վրա: