ԱՄՆ-ն՝ առանց մարտագլխիկի միջուկային ռումբ է փորձարկել

Օգոստոսին Միացյալ Նահանգները հաջողությամբ փորձարկել է B61-12 մարտավարական ջերմամիջուկային ավիառումբ՝ առանց մարտագլխիկի։

Այն նետվել է F-35 կործանիչից՝ Նևադայի Տոնոպա զորավարժարանի տարածքում: Հայտարարության մեջ նշվում է, որ փորձարկումները «դրական արդյունքներ են տվել» և կարևոր են եղել այս զենքի արդյունավետության գնահատման գործում։

ԱՄՆ Էներգետիկայի նախարարության մաս կազմող «Սանդիա» լաբորատորիան նաև նշել է, որ Ազգային միջուկային անվտանգության վարչությունը (NNSA) 20 տարով երկարաձգել է B61-12 ռումբերի ծառայության ժամկետը։

Հիշեցնենք, որ B61 շարքը համարվում է ԱՄՆ ռազմավարական միջուկային ուժերի հիմնական զենքերից մեկը։ Այն մշակվել է 1961 թվականին, իսկ ներկայում ԱՄՆ-ի զինանոցում կիրառվում են B61-11 և B61-12 տարբերակները։