Նիդեռլանդները համալրում է Ուկրաինայի զինամթերքի պաշարները PURL նախաձեռնությամբ

Նիդեռլանդներն Ուկրաինային լրացուցիչ 250 միլիոն եվրո ռազմական աջակցություն կտրամադրի PURL նախաձեռնության միջոցով, որը թույլ է տալիս եվրոպական երկրներին ամերիկյան պաշարներից զենք ձեռք բերել։ Այս մասին հայտարարել է Նիդեռլանդների պաշտպանության նախարարի պաշտոնակատար Ռուբեն Բրեկելմանսը։

«Այսօր հայտարարում եմ, որ Ուկրաինային PURL-ի միջոցով հատկացվում է 250 միլիոն եվրո։ Սա միակ միջոցն է՝ շատ կարճ ժամանակահատվածում ավելի շատ հակաօդային պաշտպանության (ՀՕՊ) զինամթերք, ինչպես նաև F-16 կործանիչների համար անհրաժեշտ զինամթերք և ԱՄՆ-ի պաշարներից այլ նյութեր տրամադրելու համար»,– նշել է նա Բրյուսելում, ԵՄ երկրների պաշտպանության նախարարների հանդիպումից առաջ։

PURL նախաձեռնությունը գործարկվել է հուլիսի 14-ին՝ ԱՄՆ նախագահ Դոնալդ Թրամփի և ՆԱՏՕ-ի գլխավոր քարտուղար Մարկ Ռյուտեի կողմից։ Այս մեխանիզմի միջոցով ՆԱՏՕ-ի դաշնակիցները Ուկրաինայի համար զենք են գնում ամերիկյան պաշարներից։ PURL-ի գծով մատակարարումները նախատեսվում է իրականացնել ամեն երկու-երեք շաբաթը մեկ։