ՀԱՄԱՍ-ը կհամաձայնի զինաթափվել Գազայում միայն մի դեպքում. մանրամասներ

ՀԱՄԱՍ-ը հայտարարել է, որ կհամաձայնի դադարեցնել ռազմական գործողությունները Գազայի հատվածում միայն այն դեպքում, եթե բանակցությունների միջոցով ստեղծվի Պաղեստինյան պետություն: Այս մասին հաղորդել է The Times of Israel-ը: 

ՀԱՄԱՍ-ի խոսնակն այն դիրքորոշումն է հայտնել, որ ռազմական գործողությունների դադարեցումը «չի կարող իրականացվել ուժով կամ վերջնագրերով»։

«Իսրայելը երկու տարի շարունակ օգտագործել է իր ողջ ռազմական հզորությունը՝ ստիպելու ՀԱՄԱՍ-ին զենքը վայր դնել, և դա ձախողվել է»,- հավելել է պարբերականի աղբյուրը։

Նշենք, որ հոկտեմբերի 9-ի գիշերը ԱՄՆ նախագահ Դոնալդ Թրամփը հայտարարել էր, որ Իսրայելի կառավարությունը և ՀԱՄԱՍ-ը համաձայնել են Գազայի հակամարտության լուծման վերաբերյալ Վաշինգտոնի առաջարկած ծրագրի առաջին փուլին։