Համաներմամբ ազատված 581 անձից 30-ը կրկին հանցագործություն է կատարել. Արմեն Ղուկասյան

«ԱԺ-ի կողմից հայտարարված համաներումից հետո ազատ արձակված 581 անձից 30-ը կրկին կատարել է 42 հանցագործություն այսօրվա դրությամբ` 1 ավազակություն, 28 գողություն, որից 10-ը՝ բնակարանային»,- այս մասին այսօր լրագրողների հետ հանդիպման ժամանակ ասաց ՀՀ ոստիկանության շտաբի պետ, ոստիկանության գնդապետ Արմեն Ղուկասյանը։ Անդրադառնալով կրկնահանցագործության և համաներման կապին` նա ասաց, որ նման հետազոտություն ոստիկանությունում արվել է 10 տարի առաջ, և արդյունքները ցույց են տալիս, որ համաներումից հետո հաջորդ տարին գրանցվում է հանցագործությունների աճ․ «Բայց դա չի նշանակում, որ այդ մարդասիրական քայլը, որ պետությունը անում է հանցագործների նկատմամբ, սխալ մոտեցում է։ Սա քրեական քաղաքականության մաս է կազմում և նման անձինք պետք է գտնվեն տեսադաշտում, պետք է լինեն հսկողության տակ, սակայն, ցավոք, այսօրվա գործող օրենսդրությունը դրա հնարավորությունը լիարժեք չի տալիս»,- ասաց Արմեն Ղուկասյանը: