Լոս Անջելեսի ոստիկանությունը հետաքննություն է սկսել հայկական դպրոցների գործով

ԱՄՆ Լոս Անջելեսի ոստիկանությունը հետաքննություն է սկսել հայկական մասնավոր դպրոցների դարպասներին անհայտ անձանց կողմից Թուրքիայի դրոշներ փակցնելու միջադեպը: Այս մասին հայտնում է Los Angeles Times-ը։ Ոստիկանությունը ուսումնասիրում է տեսաձայնագրությունները և պլանավորում է ուժեղացնել հսկողությունը դպրոցների շրջակայքում: Միջադեպը հարուցել է Լոս Անջելեսի հայկական համայնքի անհանգստությունն ու վրդովմունքը՝ երևույթը որակելով որպես ատելության գործողություն, որը միտված է հայկական համայնքի շրջանում վախ սերմանելուն և Հայոց ցեղասպանության վարկաբեկմանը: Հիշեցնենք, որ միջադեպի հետ կապված հայտարարություն էին տարածել նաև կոնգրեսականներ Բրեդ Շերմանը և Ադամ Շիֆը։ Նրանք դատապարտել էին տեղի ունեցածը և իրավապահ մարմիններին կոչ արել արարքի հեղինակներին ձերբակալել: Գիշերը Լոս Անջելեսի հայկական 2 դպրոցներում անհայտ անձինք Թուրքիայի դրոշներն էին կախել։ Ի պատասխան՝ հայ աշակերտները հանել էին Թուրքիայի դրոշները՝ կախելով հայկական եռագույնը։