Ֆրանսիայում ցուցարարները փորձել են հրդեհել Լ՚այ-լե-Ռոզ քաղաքի քաղաքապետի տունը

Ֆրանսիայի Լ՚այ-լե-Ռոզ քաղաքի քաղաքապետ Վենսան Ժանբրյունը հայտնել է, որ անհայտ անձինք հարձակվել են իր տան վրա և փորձել հրդեհել, ինչի հետևանքով պաշտոնյայի կինն ու երեխաները վիրավորվել են։ Այս մասին նա գրել է Twitter-ում։

«Այս գիշեր հարձակման ենթարկվեց իմ տունը, և իմ ընտանիքը մահափորձի զոհ դարձավ: Կինս և իմ երկու երեխաները շոկային վիճակում են և վիրավոր»,- ասվում է նրա հայտարարության մեջ:

Ժանբրյունը մանրամասնել է, որ հարձակումը տեղի է ունեցել ուշ գիշերին, հարձակվողները եղել են մեքենայի մեջ։ Տուժած ընտանիքի անդամների վիճակի մասին քաղաքապետը չի հայտնում։ BFMTV-ի փոխանցմամբ՝ դատախազությունը հետաքննություն է սկսել, գործը հարուցվել է «սպանության փորձ» հոդվածով։