Բոյկոտ․ Գյումրու բնակիչները պահանջում են հեռացնել նախկին ոստիկանի տաղավարը

Գյումրու Տիգրան Մեծ փողոցի բնակիչները թույլ չեն տալիս շարունակել փողոցում ընթացող շինաշխատանքները: Նրանք շինարարից եւ Գյումրու քաղաքապետարանից պահանջում են հեռացնել փողոցի եւ տարածքի շենքերի արտաքին տեսքը խաթարող երկաթե խանութ-կրպակը: Այս մասին հայտնում է armtimes.com-ը։

Լրատվականը նշում է, որ ըստ բնակիչների, այն իրենց փողոցում է հայտնվել երկրաշարժից հետո, եղել է խանութ, բայց տեւական ժամանակ փակ է: Նրանք պահանջում են վերջապես մաքրել տարածքն ու այն դարձնել խաղահրապարակ շենքերում ապրող երեխաների համար: Խոստանում են շինարարին չթողնել աշխատել այնքան ժամանակ, քանի դեռ խնդիրը չի կարգավորվի:

Շինարարարի աշխատանքը խոչընդոտող բնակիչները նաեւ նշեցին, որ խնդրահարույց տաղավարի տերը նախկին ոստիկան է, դրա համար էլ դեռ տեղում է մնացել:

Ըստ Գյումրու քաղաքապետարանի, տաղավարի հողատարածքը համայնքապատկան է:

Շինությունը քանդելու համար Գյումրու քաղաքապետարանը դատական հայց է ներկայացրել, որն առաջին ատյանի դատարանում լուծվել է հօգուտ սեփականատիրոջ: Ներկա պահին քաղաքապետարանը բողոքարկել է դատարանի որոշումը: Սպասում են պատասխանին:

Հիշեցնենք, որ սա հենց այն փողոցն է, որն անընդհատ հայտնվում է վարչապետ Նիկոլ Փաշինյանի ուշադրության կենտրոնում: Վերջերս այստեղ շրջայց էր իրականացրել Տարածքային կառավարման ու ենթակառուցվածքների նախարար սուրեն Պապիկյանն եւ այդ այցի ընթացքում էլ նկատել էր, որ նոր կառուցվող փողոցում չպետք է լինեն ժամանակավոր կացարաններ եւ տաղավարներ: