Իսպանիայում անկարգությունների ընթացքում տասնյակ մարդիկ են բերման ենթարկվել

Իսպանիայում ռեփեր Պաբլո Ասելի ձերբակալության դեմ բողոքի ակցիաների ժամանակ մոտ 50 մարդ է ձերբակալվել։ Այս մասին հայտնում է El Periodico թերթը՝ հիշեցնելով, որ ռեփերը դատապարտվել է ահաբեկչության փառաբանման և թագավորական ընտանիքին վիրավորելու համար։

Ձերբակալություններ են կատարվել Մադրիդում, Բարսելոնում և ողջ Կատալոնիայում։
Տուժածներ կան և՛ ոստիկանների, և՛ ցուցարարների շարքերում։

Ոստիկանությունը կոշտ է արձագանքել հասարակական կարգի խախտման փորձերին և ցուցարարների դեմ կիրառել ռետինե փամփուշտներ, մահակներ և արցունքաբեր գազ։ Ի պատասխան՝ ցուցարարներն իրավապահների ուղղությամբ քարեր են նետել։

Նշենք, որ փողոցային անկարգությունները սկսվել են ռեփերի ձերբակալությունից հետո։ Ոստիկանությունը ստիպված է եղել գրոհել կատալոնական Լերիդա քաղաքի համալսարանի շենքը՝ ռեփերին ձերբակալելու համար։