Հայտնի է, թե ինչու են Դավիթ Մինասյանին տեղափոխել այլ ՔԿՀ

Սուրբ Աննա եկեղեցում տեղի ունեցած միջադեպից հետո կալանքի տակ գտնվող 18-ամյա Դավիթ Մինասյանին «Արմավիր» ՔԿՀ-ից տեղափոխում են «Աբովյան» ՔԿՀ՝ նրա ուսումը չընդհատելու նպատակով։ Այս մասին Sputnik Արմենիայի հետ զրույցում հայտնել է ՀՀ ԱՆ Քրեակատարողական ծառայության մամուլի խոսնակ Նոնա Նավիկյանը։

«Տեղափոխման հիմքում ընկած է անձի լավագույն շահը, հաշվի է առնվել ազատությունից զրկված անձի տարիքը և միջնակարգ կրթության շարունակականության ապահովման կարևորությունը»,- ասել է Նավիկյանը։

Ավելի վաղ նրա պաշտպան Լուսինե Մարտիրոսյանը նշել էր, որ տեղափոխումն իրականացվում է «Արմավիր» ՔԿՀ-ից դեպի «Աբովյան» ՔԿՀ։

Հարկ է նշել, որ «Աբովյան» ՔԿՀ-ն նախատեսված է կանանց և անչափահասների համար, սակայն օրենքով թույլատրվում է, որ չափահաս դառնալուց հետո մինչև 21 տարեկան անձը շարունակի մնալ այնտեղ, եթե դրսևորել է դրական վարքագիծ։ Անչափահասները կրթություն են ստանում հենց քրեակատարողական հիմնարկում։