Առաջիկայում ունենալու ենք մահերի օրական տասը դեպք. Փաշինյանը՝ երկրում կորոնավիրուսով պայմանավորված իրավիճակի մասին

Առաջիկայում ունենալու ենք մահերի օրական տասը դեպք: Այս մասին պարետատան նիստից հետո ասաց վարչապետ Նիկոլ Փաշինյանը։

Իր խոսքով՝ երեկ 525 նոր դեպք ենք ունեցել. «Սա նշանակում է, որ այս վիճակագրության բերումով առաջիկայում անխուսափելիորեն ունենալու ենք տասը մահ»:

Փաշինյանը նկատեց, որ այսօրվա դրությամբ ունենք կորոնավիրուսով 19 000 ակտիվ հիվանդ, որոնցից 2106-ը հիվանդանոցային պայմաններում է գտնվում, նրանցից 536-ի վիճակը գնահատվում է ծանր, 117 -ինը՝ առանձնապես ծանր, 1730 հիվանդի մոտ արձանագրվել է թոքաբորբ, երեկ մահվան 10 նոր դեպք է արձանագրվել, մահերի ընդհանուր թիվը կազմում է 453։

«2020 թվականի առաջին հինգ ամիսների մահերի վիճակագրությունը բարվոք է։ Ավելի քիչ մահ էինք ունեցել, քան նախորդ տարվա նույն ժամանակաշրջանում։ Ցավոք, պետք է արձանագրեմ, որ այդ վիճակագրությունը փոխվել է, և հունիսին նախորդ տարվա հունիսի համեմատ՝ մոտ 30 տոկոսով ավելի մահացություն ենք ունեցել։ Թեև այս թվերը ոչ ամբողջությամբ են կապված կորոնավիրուսի հետ, բայց կորոնավիրուսի ընթացիկ վիճակը էականորեն նպաստում է այս գործոնին», - ասաց Փաշինյանը։