Դաշինք` «հեգեմոնների վասալ» չդառնալու նպատակով. Մակրոնի առաջարկը

Ֆրանսիայի նախագահ Էմանուել Մակրոնը ասիական շրջագայության ընթացքում առաջարկել է ձևավորել երկրների նոր դաշինք՝ գլոբալ գործընթացներում ԱՄՆ-ի և Չինաստանի ազդեցությանը հակակշիռ ստեղծելու նպատակով։ Այս մասին հաղորդում է Bloomberg-ը։

Սեուլում ելույթի ժամանակ Մակրոնը նշել է, որ «միջին պետությունները» պետք է համագործակցեն և չդառնան երկու գերտերությունների ազդեցության տակ գտնվող կողմեր։ 

«Մեր նպատակն է` չդառնալ երկու հեգեմոնների վասալ», - Սեուլում ուսանողներին ասել է Մակրոնը։ Նա հավելել է, որ չի ցանկանում կախված լինել Չինաստանից կամ չափազանց ենթարկվել ԱՄՆ-ի անկանխատեսելիությանը։ 

Մակրոնը նաև ընդգծել է, որ նման համագործակցությունը կարող է ընդգրկել արհեստական բանականության, տիեզերքի, էներգետիկայի, միջուկային ոլորտի, պաշտպանության և անվտանգության ուղղությունները։ Նա հայտարարել է, որ նպատակն է խուսափել թե՛ Չինաստանից կախվածությունից, թե՛ ԱՄՆ քաղաքականության անկանխատեսելի ազդեցությունից։

Նրա հայտարարությունները հնչել են ԱՄՆ նախագահի քննադատության ֆոնին, ով, ըստ հաղորդումների, դժգոհություն է հայտնել դաշնակիցների դիրքորոշումից Իրանի շուրջ զարգացումների հարցում։ Մակրոնը պատասխանել է, որ Ֆրանսիան չի մասնակցում ռազմական գործողություններին և չի ներգրավվել որոշումների ընդունման գործընթացում։ Նա նաև նշել է, որ միայն ռազմական միջոցներով հնարավոր չէ լուծել Մերձավոր Արևելքի խնդիրները և առաջարկել է ստեղծել հակամարտությունների կանխարգելման մեխանիզմներ, ինչպես նաև ապահովել նավագնացության անվտանգությունը Օրմուզի նեղուցում։