Օլիմպիական խաղերի բացման արարողության ժամանակ կփակվեն Փարիզի շրջակայքի բոլոր օդանավակայանները

Հուլիսին Օլիմպիական խաղերի բացման արարողության ժամանակ Փարիզի շրջակայքի բոլոր օդանավակայանները փակ կլինեն։ Այս մասին հայտնում է AIR Live-ը։

Մարտի 5-ին Սենատի լսումների ժամանակ ներքին գործերի նախարար Ժերալդ Դարմանինը պատմել է հուլիսի 26-ին Փարիզի Օլիմպիական խաղերի բացման արարողության համար նախատեսված անվտանգության միջոցառումների մասին:

Ներքին գործերի նախարարը, մասնավորապես, հայտարարել է, որ օդային տարածքը կփակվի Փարիզի շուրջ 150 կմ շառավղով։ «Բավական պատմական է, որ մենք ամբողջությամբ դադարեցնում ենք օդանավակայանի աշխատանքը», - ասել է Դարմանինը: Բացի այդ, արարողության ժամանակ անվտանգության նկատառումներից ելնելով թռչելու են ուղղաթիռներ ու անօդաչու սարքեր։

Փարիզի ամառային Օլիմպիական խաղերը կանցկացվեն հուլիսի 26-ից օգոստոսի 11-ը, իսկ Պարալիմպիական խաղերը՝ օգոստոսի 28-ից սեպտեմբերի 8-ը: