14 ուխտավոր է մահացել Հաջի ժամանակ. Սաուդյան Արաբիայում զոհերի թիվը կարող է աճել

Սաուդյան Արաբիայում Հաջի ուխտագնացության ժամանակ սաստիկ շոգի պատճառով Հորդանանի 14 քաղաքացի է մահացել, ևս 17-ը համարվում են անհետ կորած։ Այս մասին հայտնում է Հորդանանի արտաքին գործերի նախարարությունը։

Ենթադրվում է, որ իսլամական աշխարհի կարևորագույն սրբավայրերից մեկում զանգվածային ուխտագնացության ժամանակ զոհերի թիվը կարող է աճել։ Միաժամանակ Իրանի Կարմիր մահիկը հաստատել է հինգ իրանցի ուխտավորի մահը, սակայն չի հստակեցրել, թե ինչպես են նրանք մահացել։

Նշենք, որ Հաջը՝ կրոնական ծեսը, աշխարհի ամենամեծ զանգվածային հավաքներից մեկն է և պարտադիր է բոլոր մուսուլմանների համար: Սաուդյան Արաբիայի պաշտոնյաների տվյալներով՝ այս տարի ուխտագնացությանը կմասնակցի ավելի քան 1,8 միլիոն մարդ: