Կվերադարձնենք նրանց քարե դար․ Թրամփի սպառնալիքն Իրանին

ԱՄՆ նախագահ Դոնալդ Թրամփը հայտարարել է, որ առաջիկա երկու-երեք շաբաթվա ընթացքում Վաշինգտոնը կարող է ուժեղացնել ռազմական գործողությունները Իրանի դեմ՝ նպատակ ունենալով կանխել երկրի կողմից միջուկային զենքի ձեռքբերումը։ Նրա խոսքով՝ Միացյալ Նահանգները շարունակում է բանակցել Թեհրանի հետ, սակայն պատրաստ է դիմել կոշտ քայլերի, եթե համաձայնություն ձեռք չբերվի։ Մենք նրանց կվերադարձնենք քարե դար, որտեղ նրանց տեղն է։

Սպիտակ տանը ունեցած ելույթի ժամանակ Թրամփը նշել է, որ ԱՄՆ-ը կարող է հարվածներ հասցնել Իրանի էներգետիկ ենթակառուցվածքներին։ Նա ընդգծել է, որ այդ քայլը կդիտարկվի որպես ճնշման միջոց, եթե բանակցությունները արդյունք չտան։ Միաժամանակ նա հավելել է, որ ԱՄՆ-ը մոտ է իր «ռազմական խնդիրների ավարտին»։

Թրամփը նաև հայտարարել է, որ Իրանի միջուկային ներուժը, իր գնահատմամբ, սպառնալիք է ԱՄՆ-ի համար և պետք է թուլացվի։ Նա պնդել է, որ ԱՄՆ-ը ոչնչացրել է Իրանի ռազմածովային ուժերն ու հրթիռային հնարավորությունները, ինչպես նաև նպաստել է երկրում քաղաքական փոփոխություններին, սակայն այդ պնդումները չեն մանրամասնվել։

Բացի այդ, ԱՄՆ նախագահը անդրադարձել է Օրմուզի նեղուցի իրավիճակին՝ նշելով, որ Վաշինգտոնը չի նախատեսում նախաձեռնություն վերցնել դրա վերաբացման հարցում։ Նա կոչ է արել նեղուցից կախված երկրներին ինքնուրույն ապահովել անցանելիությունը և դիտարկել այլընտրանքային տարբերակներ, այդ թվում՝ նավթի գնումը ԱՄՆ-ից։